RASMI: Abaalmarinta Xiddigii Ugu Fiicnaa Premier League Bishii September Oo La Shaaciyay & Xiddigo Waaweyn Oo Lagu Garaacay

Maamulka horyaalka Premier League ayaa ku dhawaaqay ciyaaryahanka kusoo guuleystay xiddigii ugu fiicnaa horyaalkaas bishii dhammaatay ee September waxaana loo doortay weeraryahanka Everton ee Dominic Calvert-Lewin oo wakhtigii ugu fiicnaa noloshiisa ku jira.

Calvert Lewin ayaa ilaa hadda lix gool afar kulan oo Premier League ah kasoo dhaliyay halka uu sagaal gool kusoo dhaliyay lix kulan oo tartamada oo dhan ah.

Image

Intaas waxa dheer in Dominic markiisii ugu horreysay abid looga yeedhay xulka qarankiisa England isla markaana uu kulankiisii ugu horreeyay oo xalay ahaa gool kasoo dhaliyay xulka Wales.

Shantii gool ee uu Calvert-Lewin bishii September kasoo dhaliyay horyaalka ayaa kasoo caawisay Everton inay markii ugu horreysay tan iyo xilli ciyaareedkii 1993-94 saddexdooda kulan ee ugu horreeya horyaalka soo guuleystaan.

Calvert-Lewin ayaa xilli ciyaareedka ku bilawday inuu kulankii furitaanka ee kooxdiisa goolka guusha kasoo dhaliyay Tottenham oo ay booqdeen kahor inta uusan saddexley ka dhalinin West Bromwich Albion isagoo markale Crystal Palace shabaqa kasoo taabtay.

23 sano jirkan ayaa ah xiddigii ugu horreeyay ee Toffees ka tirsan ee ku guuleysta abaalmarintaas tan iyo 2017-kii markaas oo uu Romelu Lukaku soo hantay.

Dominic ayaa kaga guuleystay abaalmarinta xiddigaha kala ah Harry Kane, Patrick Bamford, Timothy Castagne, Jamie Vardy, Tariq Lamptey iyo James Rodriguez oo ay isku koox yihiin.

App-ka Gool24.net waxaad ka degsan kartaa google play store, wararka degdeg ah waxay kuugu soo dhacayaan mobile-kaaga RIIX HALKAAN SI AAD U DEGSATO

Be the first to comment

Leave a Reply

Your email address will not be published.